Ngayon na!

Ngayon na ang pagmulat sa mga matang nakapikit,

Kaytagal na panahon ding inaliw sa madilim, ang paniniwalang

di napukaw ng panaghoy, pinilit sinadyang isara

habang ang mga buwaya at mga buwitri'y naglipana,

pinapangal ang mga butong natitira pa

ng inang bayang pinagsamantalahan nila.

I

Ngayon na ang panahon upang gisingin ang iba,

ang sinimulan sa panulat ay ibahagi, mga tula,

sanaysay, gumuhit, magsalarawan, at ating ibandera

ang naitago sa dilim sa liwanag ipakita!

II

Ngayon na ang pag-apula ng mapanira at matalas na apoy,

Na walang awang lumalamon ng kabuhayan at buhay,

Ng dangal at pagkatao niyaong musmos na mga  kabataan,

Ng mahina't malabagsak  pa sa paglaban sa buhay.

III

Ngayon na ang panahon, sapagkat ngayon na nga,

Na ang mga dyablo'y nananalasa at hindi na masawata,

Hindi nga tayo mga Diyos, hindi rin si Bathala,

Subalit may tungkulin tayo na dapat gampanan sa bayan at sa kapwa.