Aligagang alipanog

Nagkukumahog sa pagsalag
Kaliwa’t kanan, ang pag-ilag
Pagtatagni ng kabulaanan
Nagbubulid sa kapahamakan

Aligaga nang totoo
Ayan at di magkandatuto
Anta anong ipinag-aalala mo?
Mabunyag ang totoo?

Alipanog ka kasi
Inintindi sana ay pagpapabuti
Trabahong marangal at pagsisilbi
Hindi pagpapayaman ng madali

Sintang a at simpalong ni tatang
ni inang, ng mga kapatid at pinsan
Kasama ng sawa nang taong bayan
Siguradong hindi na kayang lusutan

Kundangan kasi’y isa kang palalo
Kaya ngitngit ng bayan ngayo'y iyong sinasapo
Taanggapin mo't pagdusahan ang katotohanan
Ipagbubunyi naman namin ang aming  kalaayaan.

Kibord

Matalik na kaibigan

Araw-araw kaulayaw
Isinasalin laman ng isipan
Nagpapangiti kung may lumbay
Inihahatid mo laman ng aking puso
Lungkot napapawi sa bawat dotdot ko
Buhay ko’y paano kung tayo’y magkalayo?
Kasiping ka sa tuwina
May nabuo ng ngang pag-ibig sa isa’t-isa
Sa tuwing tayo’y nagniniig
Ligaya’y walang kaparis.
Salamat sa iyong pang-unawa
Ipagpaumanhin mo kung minsan
Sa pagkasura’y napagbubuntunan
Iyo sanang pagpasensyahan
Kung ika’y aking napagdadabugan
Tuwina’y hinahanap-hanap iyong lambing
Mga haplos tuwing nagsisiping
Wala ng hahanapin pa
Kompatibol na tayong dalawa

The Promise

how many times I slip and fall

into the pit of my own,
into the dangers of rocks and cliffs?

You are my only anchor,
a strength I can seek in the mists of rainbow,
a power I can seek In every raindrop.

And though at  the end of the road
I have failed you;  still,  as you’ve promised
the sun shines.   And during  stormy nights

You guide me  as I  sail, until the giant waves
toss me back safely,  to touch the fine sand
and once again embrace coolness of the shore.

PARUPARO

Liliparin ko ang langit,

Maglalambitin ako sa ulap

at dadapo sa iyong hardin.

Paruparo akong naglalambing,

Umaaligid sa iyong mga tanim;

Hahalikan ko ang bawat talulot,

Sasamyuhin ang bango,

Sisimsimin ang katas.

At sa aking galak, masuyong ipapagaspas

ang makulay kong mga pakpak,

sasayaw sa saliw ng hanging amihan.

Muli't muli kong babalikan ang iyong hardin,

Dadalawin, pupupugin ang iyong mga tanim

Na nagpapaligaya sa akin.

Ngunit bayaan mo ring aking linisin

Ang  lipak sa iyong mga kamay;

Bayaang bugahan ng tubig,

Bayaang aking haplusin.

Pagod mong katawan

Aking aawitan,

Bayaang pawiin, bigat ng suliranin.

Pansamantala ang halimuyak ng mga bulaklak

Na namumukadkad sa iyong hardin,

Pag dating ng bagyo, saglit lamang

at kapagdaka, tatangayin sila ng hangin;

Subalit ikaw, hardinero,

Ang pagmamahal mo sa iyong hardin,

Di hamak na mas masamyo

Kaysa mga bulaklak na iyong itinanim.

SANA’Y MARINIG KONG MULI

(kay tambering)

Nakamasid sa dingding

sumisisid ang isip sa malayong lupain,

nanunumbat ang kulimlim na alaala

“Nasaan ka? Nasaan ka?”

Gusto  rin sana kitang ihatid

sa huli mong hantungan;

mahandugan ka man lamang

ng isang awitin.

Sana'y napakinggan mo

ang aking maling tono,

na alam kong itutuwid mo --

ikaw na tagahubog ng musika.

Sa gitna nitong nagmamaktol na lungkot,

ng pagkayamot sa pagkakabaluktot,

sana'y marinig kong muli

ang iyong tinig, himig ng ating lipi.

sampaguita

bulaklak ng sampaguita

gusto kitang masilayan,

gusto kong malanghap

ang iyong halimuyak;

ngunit alam kong mas mabango

ang kaibigan kong nag-iwan sa iyo

sa aming aming pintuan.

IMIGRASYON

1.

Babalikwas sa umagang kaylamig,

Haharap sa pandesal

At itim na kapeng umuusok,

Maliligo, maghihilod,

Kaygulo ng isip.

Babalikwas pagkat gustong tumakas

sa hirap,  upang tiyakin ang bukas.

Sa pag-aabang ng sasakyan,

Makikipaggitgitan sa kalsada

Makikipagsiksikan, aagaw ng upuan,

Sisingit kahit malanghap

Ang hanging hitik sa anghit.

Dudugtong sa yatyatang pila

Ng mga nagnanais mangibang bansa;

Mamimitig ang mga ugat sa binti,

Aabutin ng tanghalian, ng hapunan

Manunuyo ang lalamunan,

kakalam ang sikmurang papakalmahin

sa pakikipagdaldalan sa ibang mga dila.

Ririndihin ng mga di-magkamayaw na ingay

At tanawin. May nagliligawan, may nagsisigawan,

May mga batang pumapalakat ng iyak.

Pagkatapos ng maghapong pagkabaktad

Sa init ng araw,

Sasalubungin naman ng init ng ulo

Ng guwardiyang minumuta;

At sa halip na papasukin,

Sasabihing sarado na at ikaw’y pauuwiin.

Lalong titindi ang pag-asam

Na makapasok na sa tanggapan

Makatuntong man laang sa carpet,

Mabugahan man laang ng hangin

Mula sa makinang pampalamig.

At sana, makausap ang taong puti.

At habang sinasalat ang masuknit na buhok

Iniisip kung anong lagay ng papeles.

Sa tambak ng mga aplikasyon

Halos hindi masilip,  halos di  mapansin

Ano kaya ang balita?

Kaylayo pa ng napitas mong  numero

Habang unti-unti ka nang namumutla.

Sa takipsilim ikaw ay uukyabit

Pabalik sa iyong pinanggalingan.

Sisingit ulit sa dasik na jip o bus,

Bitbit ang kabiguan sa maghapong

Walang napala.

Kinabukasan, muling babalikwas

Upang ulitin ang kahapong kalbaryo.

Muling makikipagdikdikan

Sa sangkatutak na taong nagmula

Sa kung saan-saang lupalop.

Mga taong tulad mo’y isang kahig-isang tuka,

Mga taong di susuko sa pagkahig

Matakasan lamang ang kahirapan.

2.

Sa pila, biglang napaaray

Ang matandang nakausli ang puwet,

Kinagat ng pilyong paslit.

May mamang umalis laang saglit

Sa pila ay di na nakabalik;

Ang mga puti, walang pakialam

Magutom man o himatayin

Ang mga taong umaamot ng kanilang pansin.

Sa oras nang medical exam

Kundi matuklasang ikaw ay may sakit

Na nakakahawa, o sakit na inimbento lamang

ng bayarang doktor,

Huwag gaanong mangamba,

Maglagay at makakalusot ka.

Sa pagkuha ng police clerance

Huwag kang mabibigla

Kung may kaso kang bubulaga,

Nagnakaw, nagdispalko, o kung ano pang bintang;

Maglagay nang maabsuwelto.

At sa pagkuha ng pasaporte,

Sa panibagong pagpila,

Halos makipagmurahan ka sa kinauukulan

Na umaastang matinong kausap

At sa iyo’y nagmamalasakit;

Pero pasaporte mo pala’y iniipit;

Maglagay nang dumaloy ang serbisyo.

Sa tinutuluyang apartment,

Makikisuyo ka sa pagligo

Para maibsan man lang ng pagod

Ang katawan mong nanlalagkit.

Pero Diyos ko ang tubig!

Parang nakiraang patak ng ulan

O kaya naman,  pagpihit mo ng gripo

Bubuga laang ang hanging amoy kalawang.

Pero titiisin ang lahat

pagkat di matitinag ang pangarap

Na abang buhay ay umunlad.

At magpapatuloy ka sa pakikipagsapalaran

Magpapatuloy ka sa pangingibang-bansa,

Nawa'y palarin ka.